«Էրեբունի» բժշկական կենտրոն

Նորություններ

Բազմակի հեմանգիոմաներով կինը ծննդաբերել է «Էրեբունի» ԲԿ ծննդատանը

Բազմակի հեմանգիոմաներով կինը ծննդաբերել է «Էրեբունի» ԲԿ ծննդատանը

 33-ամյա Սվետլանան «Էրեբունի» ԲԿ ծննդատուն էր դիմել հղիության հենց սկզբից: Ծննդատան ղեկավար Անդրանիկ Պողոսյանի մոտ առաջին այցելության ընթացքում պարզվել էր, որ հղին ունի առողջական մի շարք խնդիրներ: Փոքր տարիքում Սվելանային ախտորոշվել էր մեծ ծավալի հեմանգիոմա, որը սկսվում էր ձախ ոտքի ազդրային հատվածից, տարածվում ամբողջ մաշկի վրա, հասնում թաթի հատված, առկա էր նաև կոնքազդրային հոդի պարալիզացում: Հեմանգիոման բարորակ գոյացություն է, որն առավելապես տեղակայված է լինում մեկ օրգանի վրա՝ չառաջացնելով առողջական խնդիրներ: Սվետլանայի մոտ հեմանգիոմաներն ունեն բազմակի տեղակայումներ և վաղ տարիքում առաջացրել էին ներքին արյունահոսություն, կատարվել էր այն կանգնեցնող վիրահատական մեծ միջամտություն: Անկախ խնդիրներից՝ Սվետլանան որոշել էր ռիսկի գնալ և երեխա ունենալ: Չնայած բարդ և բացառիկ դեպքին՝ Անդրանիկ Պողոսյանն արել է ամեն ինչ՝ հղիությունը բարեհաջող ավարտին հասցնելու համար: Կատարվել են լաբորատոր-գործիքային անհրաժեշտ հետազոտություններ, այդ թվում՝ ՄՌՏ հետազոտություն: Պարզվել էր, որ բացի արտաքին հեմանգիոմաներից՝ առկա են նաև բազմաթիվ ներքին հեմանգիոմաներ լյարդի, որովայնամզի, միզապարկի, թոքերի վրա: Հղիության ընթացքում արյան մակարդելիության ցուցանիշները բարձրացել էին կրկնակի և միտումը շարունակվում էր: Այս խնդիրներն ամեն պահի կարող էին առաջացնել թրոմբոզ, արյունահոսություններ և կյանքի սպառնալիք դառնալ: Հղիության ամբողջ ընթացքը Սվետլանան գտնվել է «էրեբունի» ԲԿ ծննդատան գինեկոլոգների և Արյունաբանական կենտրոնի մասնագետների (Հեղինե Խաչատրյան) հսկողության տակ: Ստացել է համապատասխան բուժում, սակայն արյան մակարդելիության խնդիրերն այդպես էլ չեն կարգավորվել: Ռիսկերը պահպանվել են նաև ծննդաբերության ընթացքում: Հղիության 36 շաբաթականում որոշվել է կատարել կեսարյան հատում, որն իրականացվել է ընդհանուր անզգայացման պայմաններում: Կեսարյան հատումը կատարել է Անդրանիկ Պողոսյանը` մաբկաբարձ֊գինեկոլոգ Անահիտ Անանյանի և ծննդատան անեսթեզիոլոգիայի և ինտենսիվ թերապիայի ծառայության ղեկավար Լուսինե Դանիելյանի հետ։ Լույս աշխարհ է եկել Սվետլանայի աղջիկը՝ լիովին առողջ: Վիրահատությունից հետո 24 ժամ ծննդկանը գտնվել է ինտենսիվ թերապիայի բաժանմունքում, որտեղ նախապես պատվիրված և պատրաստված էր համապատասխպան խմբի էրիթրոցիտար զանգված: Սակայն արյան փոխներարկման կարիք այդպես էլ չի եղել: Բժիշկների համառ պայքարի, Սվետլանայի և ամուսնու ուժի, լավատեսության շնորհիվ հնարավոր է եղել հաղթահարել բոլոր դժվարությունները: Ինչպես նրան խոստացել էր Անդրանիկ Պողոսյանը՝ Սվետլանան «Էրեբունի» ԲԿ-ից դուրս էր եկել իր փոքրիկի հետ:

13.07.2021
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Դեպի վեր