Ծննդատուն

Հղի կնոջ և ապագա երեխայի վիճակի ժամանակին որակյալ և մասնագիտական բժշկական հսկողությունը, ծննդաբերության և հետծննդյան շրջանի գրագետ վարումը կարող են կանխարգելել կրիտիկական վիճակներ՝ հանդիսանալով մոր և մանկան առողջության գրավական:

Էրեբունի ԲԿ-ի ծննդատունն ունի III աստիճանի բարձրագույն կատեգորիա և հանդիսանում է բազմապրոֆիլ հիվանդանոցի բաղկացուցիչ մասը, որտեղ հսկվում և ծննդալուծվում են բարձր ռիսկի հղիներն ինչպես մանկաբարձագինեկոլոգիական ախտաբանություններով, այնպես էլ այլ օրգան-համակարգերի հիվանդություններով:

Էրեբունի ԲԿ-ի հարմարավետ և բարձր որակավորում ունեցող ծննդատանը յուրաքանչյուր տարի գրանցվում է ավելի քան 4000 ծնունդ և տարեկան մոտավորապես 27 000 կին ստացիոնար բուժում է ստանում օպերատիվ ու կոնսերվատիվ գինեկոլոգիայի բաժանմունքներում: Ծննդատան ամբուլատոր ծառայությունը յուրաքանչյուր տարի սպասարկում է մոտավորապես 200 000 կնոջ:

Ծննդատան կազմի մեջ են.

• Կանանց վերարտադրողական առողջության կենտրոնը,
• Գինեկոլոգիայի բաժանմունքը,
• Հղիների պաթոլոգիայի բաժանմունքը,
• Ծնարանը և հետծննդյան բաժանմունքը,
• Նորածնային բաժանմունքը,
• Ծննդատան անեսթեզիոլոգիայի և ինտենսիվ թերապիայի բաժանմունքը:

Կանանց վերարտադրողական առողջության կենտրոնի գործունեության հիմնական ուղղություններն են՝ բարձր ռիսկի խմբի հղիների վարում, կանանց մոտ նախաքաղցկեղային հիվանդությունների կանխարգելում և վաղ հայտնաբերում, անպտղության բուժում, պացիենտների համար կրթական ծրագրեր, ընտանիքի պլանավորում և այլն: Կենտրոնի առաջատար մասնագետները կատարելագործվել են Հարվարդի և Կալիֆորնիայի (ԱՄՆ) համալսարաններում, Betta Israel Hospital-ում (Boston): Կենտրոնն աշխատում է միջազգային չափանիշներով և համապատասխան ուղեցույցներով:

Գինեկոլոգիայի բաժանմունքում իրականացվում է գինեկոլոգիական հիվանդությունների վիրահատական և կոնսերվատիվ բուժում: Կոնսերվատիվ եղանակները նախատեսված են էնդոկրին խանգարումներով, կանանց սեռական օրգանների բորբոքային հիվանդություններով, անպտղությամբ և վիժումներով ընթացող գինեկոլոգիական հիվանդների բուժման համար: Բաժանմունքում իրականացվում են բոլոր պրոֆիլային խոռոչային վիրահատությունները: Մասնագետների որակավորման բարձր աստիճանը և բազմամյա փորձը թույլ են տալիս բարդ լապարոսկոպիկ վիրահատություններ կատարել: Բաժանմունքում մշակված են վիրահատական միջամտությունների իրականացման յուրօրինակ եղանակներ՝ ավանդական (լապարոտոմիա), հեշտոցային և լապարոսկոպիկ մուտքով: Բաժանմունքը հագեցած է ժամանակակից էնդոտեսավիրաբուժական “Karl Stozz” (Գերմանիա) համալիրով:

Բարձր ռիսկի հղիների բաժանմունքում իրականացվում է մանկաբարձական ախտաբանությամբ, արտասեռական հիվանդություններով հղիների ախտորոշում և բուժում. վերջիններս կազմում են հղիների ընդհանուր քանակի մոտավորապես 10%-ը: Ժամանակակից բժշկագիտությունը մշակել է հղիների վիճակի դիտարկման և վաղաժամ ծննդաբերությունների ու անցանկալի բարդությունների կանխարգելման արդյունավետ մեթոդներ: Հետևաբար, շատ կարևոր է ռիսկի գործոնների վաղ հայտնաբերումն ու որոշումը՝ բացասական հետևանքները նվազեցնելու և բարեհաջող ծննդալուծում ապահովելու նպատակով: Յուրաքանչյուր տարի բաժանմունքում հետազոտվում և բուժվում է մոտավորապես 2000 հղի: Վերջին տարիների ընթացում նկատվում է բաժանմունք դիմող բարձր ռիսկի հղիների քանակի ավելացում:

Էրեբունի ԲԿ-ի ծննդատան ծնարանում ցուցաբերվում է բարձր տեխնոլոգիական մանկաբարձական օգնության ամբողջ սպեկտրը, որն իր մեջ ներառում է դասական մանկաբարձության ավանդույթները՝ նորագույն պերինատալ տեխնոլոգիաներով: Ծնարանը հագեցած է հղիի և պտղի ներարգանդային վիճակը գնահատող ժամանակակից սարքավորումներով: Ծնարանում առկա են անհատական սենյակներ, որոնք հղիներին տրամադրվում են ծննդաբերության ընթացքում և վաղ հետծննդյան շրջանում: Ծնարանում տարեկան ընդունվում է ավելի քան 4000 ծնունդ: Ծննդաբերության ժամանակ կիրառվում են ցավազրկման տարբեր եղանակներ՝ հաշվի առնելով ծննդկանի և պտղի վիճակը, ինչպես նաև բարձր ռիսկի հղիների ծննդալուծման ժամանակակից մոտեցումները, ինչը հնարավորություն է տալիս խուսափել տարբեր մանկաբարձական բարդություններից: Ծննդաբերության ցավազրկման նպատակով լայնորեն կիրառվում է տևական էպիդուրալ անզգայացումը, որն ունի բարձր ցավազրկող արդյունավետություն՝ առանց ծննդաբերական գործունեության ընկճող ազդեցության մոր և պտղի վիճակի վրա: Էպիդուրալ ցավազրկումն իրականացնում են բարձր որակավորված անէսթեզիոլոգները, ովքեր կատարելապես տիրապետում են վերոնշյալ եղանակին:

Ծննդատան անեսթեզիոլոգիայի և ինտենսիվ թերապիայի բաժանմունքն ապահովում է հղիների, ծննդկանների և գինեկոլոգիական հիվանդների անզգայացման և վերակենդանացման ծառայության իրականացումն ինչպես պլանային, այնպես էլ անհետաձգելի կարգով ՝ շուրջօրյա ռեժիմով, Հայաստանի ամբողջ տարածքում: Բաժանմունքում, ըստ ցուցումների, կիրառվում է ներշնչափողային, էպիդուրալ, ներերակային, դիմակային անզգայացում: Բաժանմունքի բժիշկները կիրառում են տեղային, ընդհանուր և շրջանային անզգայացման ժամանակակից բոլոր եղանակները:

Էրեբունի ԲԿ-ի ծննդատան նորածնային բաժանմունքի մասնագետներն իրականացնում են առողջ, անհաս և հիվանդ նորածինների խնամքն, ովքեր ինտենսիվ թերապիայի կարիք ունեն: Կազմակերպվում է մոր և մանկան համատեղ կեցությունը՝ երեխայի կյանքի առաջին րոպեներից սկսած, մայրերին ուսուցանում են երեխայի խնամքի հմտությունները, խրախուսում կրծքով կերակրումը:

Ծննդատան բաժանմունքներում աշխատում են բարձր որակավորում ունեցող մասնագետներ, ովքեր բազմիցս ուսանել և մասնագիտացել են Եվրոպայի և ԱՄՆ-ի առաջատար ծննդատներում ու գինեկոլոգիական կլինիկաներում: