2003 թվականից մեկնարկել է «Էրեբունի» բժշկական կենտրոնի քիթ-կոկորդ-ականջաբանական (ՔԿԱ) բաժանմունքի և Կալիֆորնիայի UCLA համալսարանի համագործակցությունը՝ կոխլեար ներպատվաստման բնագավառում: Այս ծրագրի իրականցմանը նպաստել են Կալիֆորնիայի UCLA համալսարանի առաջատար վիրաբույժ Ակիրա Իշիյաման և Հայկական միջազգային բժշկական հիմնադրամի պատասխանատու Սալբի Ագարակյանը:
Այս օրերին «Էրեբունի» բժշկական կենտրոնի ՔԿԱ բաժանմունքում (ղեկավար՝ բ.գ.թ. Արթուր Շուքուրյան) իրականացվում են հերթական վիրահատությունները պրոֆեսոր Ակիրա Իշիյամայի և Ռուսաստանի Աուդիոլոգիական եւ լսապրոթեզավորման գիտապրակտիկ կենտրոնի կոխլեար իմպլանտացիայի բաժնի ղեկավար Վիգեն Բախշինյանի մասնակցությամբ: Վ. Բախշինյանի խոսքով, առաջին անգամ Հայաստանում վիրահատության ընթացքում օգտագործվել է wireless համակարգը. սովորաբար լսողական նյարդի ֆունկցիաների արձանագրումն իրականացվել է համակարգչի միջոցով: Խոսելով կոխլեար իմպլանտների մասին, Վ. Բախշինյանը բացատրեց, որ մարդու ներքին ականջը` խխունջը, հարյուրավոր բջիջներ ունի, որոնք լսողական ապարատի հարյուրավոր ռեցեպտորներն են: Եվ, եթե ինչ-ինչ պատճառներով այդ ռեցեպտորների ապարատը մահանում է՝ ձայնը լսողական նյարդին փոխանցելը դառնում է անհնար: Կոխլեար իմպլանտը հնարավորություն է տալիս էլեկտրական իմպուլսի շնորհիվ լսել ձայնը:
Կալիֆորնիայի UCLA համալսարանի վիրաբույժ Ակիրա Իշիյաման, խոսելով «Էրեբունի» ԲԿ ՔԿԱ բաժանմունքի մասին, նշեց. «Հայաստանը տարածաշրջանի համար կարող է կոխլեար իմպլանտացիայի գլխավոր կենտրոն համարվել: Ուժեղ թիմ է աշխատում՝ Արթուր Շուքուրյան, Վիգեն Բախշինյան…
Իշիյաման նաև ասաց, որ նոր սքրինինգային ծրագիր են սկսել նորածինների շրջանում, ինչի շնորհիվ հնարավոր կլինի մեծ արդյունքների հասնել:
Հայկական միջազգային բժշկական հիմնադրամի պատասխանատու Սալբի Ագարակյանը, խոսելով կատարված վիրահատությունների մասին, ասաց, որ 2003 թվականից 81 վիրահատություն են իրականացրել, որին կգումարվի ևս 10-ը:
Տիկին Ագարակյանն ասաց, որ այսօր բավականին դժվար է գումար հայթայթելը՝ իմպլանտների համար: «Իմ անձնական ուժերով, երբեմն համոզելով է հաջողվում գումար հայթայթել՝ ծրագիրն իրականացնելու համար: Հաճույքով ու սիրով ենք օգնում, ուրախություն պատճառում ծնողներին»: Իսկ ահա՝ վիրահատված Գագիկ Հայրապետյանի պապիկը, հուզված ասաց. «Շնորհակալությու՛ն, այս ազնիվ աշխատանքի համար»:
