Լսողության ռեաբիլիտացիայի մասնագետների հայկական ասոցիացիան, «Էրեբունի» բժշկական կենտրոնի հետ առաջին կոնգրես է անցկացնում: Մի հարկի տակ են հավաքվել ինչպես քիթ-կոկորդ ականջաբաններն, այնպես էլ աուդիոլոգները, լոգոպեդները, սուրդոմանկավարժները և հարակից ոլորտների այլ ավելի քան 250 մասնագետներ:
Համաժողովին մասնակցելու համար Երևան են ժամանել լսողության, աուդիոլոգիայի, լսողության վերականգման առաջատար փորձագետներ` Ռուսաստանից, Գերմանիայից, Բելառուսից, Վրաստանից և Միացյալ Նահանգներից։
Ներկայացվում են լսողության խանգարումների ախտորոշման, բուժման և վերականգման ժամանակակից մոտեցումները, մասնավորապես, ուշադրության կենտրոնում են նորածինների և մինչև մեկ տարեկան երեխաների աուդիոլոգիական սկրինինգի, լսողական տարատեսակ խնդիրների ախտորոշման ժամանակակից մոտեցումները, վերջին սերնդի լսողական սարքերի և իմպլանտների տեխնոլոգիական առանձնահատկություններն, ինչպես նաև լսողության ժառանգական խանգարումները և ականջի վիրաբուժությունը։
Ծանրալսությունն ամբողջ աշխարհում լուրջ խնդիր է, ինչպես առողջապահական, այնպես էլ սոցիալական տեսանկյունից: Առողջապահության համաշխարհային կազմակերպության տվյալների համաձայն այսօր աշխարհում 500 միլիոն մարդ լսողական խնդիրներ ունի, և եթե արդյունավետ ծրագրեր չձեռնարկվեն, ապա ըստ մասնագետների, 2050 թվականին լսողական խանգարումներ ունեցող մարդկանց թիվը 1 միլիարդի է հասնելու: Ամեն հազար նորածնից 2-3 երեխա ծանրալսություն ունի, որոնցից 1-2-ը` տոտալ խլություն:
Հանրապետությունում երկար տարիներ է գործում է նեոնատալ աուդիոլոգիական սքրինինգային ծրագիրը, ինչը հնարավորություն է տալիս հայտնաբերել լսողության խանգարումները, խլությունը դեռևս ծննդատանը:
Հայտնի է, որ լսողության վերականգնման համար կատարվող կոխլեար իմպլանտացիան շատ ավելի արդյունավետ է, երբ վաղ տարիքում է իրականացվում:
Ընդունելով լսողության խանգարումների ավելացող դեպքերի ահագնացող տեմպերը՝ համաշխարհային մարտահրավերները, «Էրեբունի» Քիթ-կոկորդ-ականջաբանության բաժանմունքի և առողջապահության նախարարի սուրդոլոգիայի գծով խորհրդատու, «Լսողության ռեաբիլիտացիայի մասնագետների հայկական նորաստեղծ ասոցիացիայի» նախագահ Վիգեն Բախշինյանի ջանքերով «Էրեբունի» բժշկական կենտրոնը լսողության խանգարումների հայտնաբերման և բուժման աշխատանքները ծրագրերի առաջնահերթությունների ցանկում է ներառել:
