Վնասվածքաբանության և օրթոպեդիայի բաժանմունքի ղեկավար Գագիկ Բդոյանի հեռախոսահամար +37494400333
Վնասվածքաբանությունը բժշկության ճյուղերից է, որը զբաղվում է վնասվածքների բուժմամբ՝ ընդգրկելով կոտրվածքները, հոդախախտերը, ցնցումները, ձգումները, պատռվածքները, երկարատև ճնշման համախտանիշը, սալջարդերը, վերքերը: Մինչև 40 տարեկան բնակչության մահացության առաջին պատճառը վնասվածքներն են, իսկ բոլոր տարիքային խմբերում՝ երրորդը: Վնասվածքների հիմնական պատճառներն են՝ ավտովթարները, արտադրական վնասվածքները, բռնությունը և ահաբեկչությունը:Ժամանակակից վնասվածքաբանության բուժման եղանակները թերապևտիկ և վիրաբուժական են: Հենաշարժիչ համակարգի վնասվածքների շատ դեպքերում պահանջվում է ստացիոնար բուժում և պրոթեզավորում: «Էրեբունի» բժշկական կենտրոնի վնասվածքաբանության և օրթոպեդիայի բաժանմունքը զբաղվում է բոլոր տեսակի վնասվածքների, հենաշարժիչ համակարգի բնածին և ձեռքբերովի արատների ախտորոշմամբ և բուժմամբ: Բաժանմունքը հագեցած է ժամանակակից վիրահատարանով, որտեղ յուրաքանչյուր օր իրականացվում են բարձր տեխնոլոգիական վիրահատություններ, այդ թվում՝ անհետաձգելի: Կլինիկայում կիրառվում են բուժման ժամանակակից մեթոդներ և տեխնոլոգիաներ՝ առաջարկված համաշխարհային առաջատար մասնագիտացված ասոցիացիաների կողմից (AO/ASIF, AAOS և այլն): Բաժանմունքում յուրաքանչյուր տարի իրականացվում են 1400 և ավել օրթոպեդիկ վիրահատություններ, ինչպիսիք են՝ կոնքազդրային հոդի, ծնկան հոդի էնդոպրոթեզավորումը, խոշոր հոդերի արթրոսկոպիան (կոնքազդրային, ծնկան, ուսային և սրունք-թաթային), շտկող օստեոտոմիաները և մկանաջլային պլաստիկան՝ հենաշարժիչ համակարգի բնածին և ձեռքբերովի արատների դեպքում:Կոնքազդրային հոդի տոտալ էնդոպրոթեզավորման դեպքում իրականացվում է հիվանդի ամբողջ կոնքազդրային հոդի արհեստական հոդով փոխարինման վիրահատություն: Վիրահատական բուժման տվյալ տեսակը պատկանում է բժշկական օգնության բարձր տեխնոլոգիական տեսակին և իրականացվում է բաժանմունքի բարձր որակավորում ունեցող մասնագետների կողմից: Կոնքազդրային հոդի տոտալ էնդոպրոթեզավորման հիմնական ցուցումներն են.
- կոնքազդրային հոդի արթրոզ՝ III և IV փուլերում
- ադրոսկրի վզիկի կոտրվածք
- ադրոսկրի վզիկի կեղծ հոդ
- ազդրոսկրի գլխիկի կոտրվածք
- ազդրոսկրի գլխիկի ասեպտիկ նեկրոզ
- կոնքազդրային հոդի դիսպլազիա
- ռևմատոիդ արթրիտ
- կոնքազդրային հոդի ուռուցքային հիվանդություններ
Ծնկան հոդի տոտալ էնդոպրոթեզավորումն իրականացվում է հետևյալ նպատակներով.
- ցավային համախտանիշի վերացում
- ծնկան հոդում շարժումների ծավալի վերականգնում
- ստորին վերջույթի հենարանի կարողության վերականգնում
Ծնկան հոդի տոտալ էնդոպրոթեզավորման հիմնական ցուցումներն են.
- ծնկան հոդի արթրոզ՝ III և IV փուլերում
- ազդրոսկրի և/կամ մեծ ոլոքի ասեպտիկ նեկրոզ
- ռևմատոիդ արթրիտ
- ազդրոսկրի և/կամ մեծ ոլոքի կիստայաձև վերակառուցում
- ազդրոսկրի և/կամ մեծ ոլոքի հարհոդային ուռուցքներ
Ոսկրերի կոտրվածքները բուժվում են ամենաժամանակակից մեթոդներով. DHS -DCS համակարգերով, LCP պաշարող թիթեղներով, պաշարող մեխերով, խոշոր խողովակավոր ոսկրերի փակ անտերոգրադ օստեոսինթեզով և այլն:Կլինիկան ունի ծանր պոլիտրավմաների բուժման մեծ փորձ: Իրականացվում է վերջույթների երկարացում և խոշոր ոսկրային դեֆեկտների փոխարինում Էլիզարովի սարքի օգնությամբ:Բաժանմունքում կատարվում է նաև ոտնաթաթի և սրունք-թաթային հոդի, hallux vagus (ոտնաթաթի առաջին մատի ծռվածություն), մատների ձևախախտումների, ոտնաթաթի և սրունք-թաթային հոդերի ձեռքբերովի ձևախախտումների, ջլերի վնասվածքների և հիվանդությունների, կրունկների կոտրվածքների նեղ մասնագիտացված վիրաբուժություն: Կլինիկայի բժիշկները պարբերաբար այցելում են հանրապետության մարզեր՝ տեղում մասնագիտացված վնասվածքաբանական օգնություն ցուցաբերելու, սեմինարներ անցկացնելու նպատակով: Նրանք նաև ընդգրկված են Հայաստանում և արտերկրում (Իրան, Ինդոնեզիա) աղետների բժշկության ու շտապօգնության ցուցաբերման ծրագրում, և համագործակցում են AAOS, SICOT, ATOM և այլ միջազգային կազմակերպությունների հետ: