«Էրեբունի» բժշկական կենտրոն

«Էրեբունի» բժշկական կենտրոնի քիթ-կոկորդ-ականջաբանության բաժանմունքի բաժանմունքը հիմնադրվել է 1991 թվականին՝ ՀՀ առողջապահության նախարարության, UMAF Paris կազմակերպության նախագահ Գևորգ Աբգարյանի, Փարիզի «Տրուսսո» և «Նեկեր» հիվանդանոցների ՔԿԱ կլինիկաների ղեկավար, պրոֆեսոր Նոել Եղյա Գարաբեդյանի և պրոֆեսոր Հարություն Քուշկյանի համագործակցության արդյունքում, ինչպես նաև Շառլ Ազնավուրի «SOS-Armenia» հիմնադրամի աջակցությամբ: Բաժանմունքն իրականացնում է քիթ-կոկորդ-ականջի հիվանդությունների ախտորոշում և բուժում: Այստեղ կիրառվում են միջազգային ուղեցույցները նորագույն մոտեցումներով և վիրահատական ժամանակակից հնարավորություններով: Բաժանմունքը հագեցած է նորագույն սարքավորումներով, այդ թվում՝ ներդիտակային (էնդոսկոպիկ), վիդեոլարինգոստրոբոսկոպիկ, ռադիոհաճախային, շնչառության ստուգման (ռինոմանոմետր) և այլ սարքավորումներով, որոնք հնարավորություն են տալիս իրականացնել ախտորոշիչ համալիր գործողություններ, ստանալ գերճշգրիտ պատկերներ, կատարել ճիշտ ախտորոշումներ, իսկ անհրաժեշտության դեպքում կատարել փոքր վիրահատական միջամտություններ՝ առանց հիվանդին վիրասրահ տեղափոխելու:

Բաժանմուքնում կատարվում են հետևյալ վիրահատությունները.

Քթային շնչառությունը վերականգնող և էսթետիկ վիրահատություններ՝

• արտաքին քթի պլաստիկ վիրահատություն
• արտաքին քթի և քթի միջնապատի հետտրավմատիկ դեֆորմացիաների ուղղում (մեծահասակների և երեխաների մոտ)
• քթի հարակից խոռոչների ներդիտակային (էնդոսկոպիկ) վիրահատություններ (FESS էնդոսկոպիկ ֆունկցիոնալ վիրաբուժություն)
• կոկորդի և քթի հարակից խոռոչների պոլիպների հեռացում
• քթի միջնապատի թափածակումների (պերֆորացիա) վիրահատական վերականգնում
• ստորին քթային խեցիների ռադիոալիքային ռեդուկցիա (փոքրացում)
• արտաքին քթի և քթի խոռոչի բարորակ և չարորակ ուռուցքների հեռացում

Ըմպանի վիրահատություններ՝

• քիթընպանային նշիկի (ադենոիդէկտոմիա (ադենոիդ հյուսվածքի) հեռացում
• տոնզիլէկտոմիա (քմային նշիկների հեռացում) ռադիոհաճախային եղանակով
• քմային նշիկների փոքրացում - ռադիոալիքային ռեդուկցիա
• խռմփոցի վիրահատական բուժում – փափուկ քիմքի և լեզվակի պլաստիկա
• քնի օբստրուկտիվ ապնեա համախտանիշի ախտորոշում և բուժում
• բերանի և ըմպանի ներագոյացությունների հեռացում

Լսողությունը վերականգնող և էսթետիկ վիրահատություններ՝

• Կոխլեար իմպլանտացիա (լսողությունը լավացնող համապատասխան սարքի պատվաստում խխունջի մեջ)
• թմբկախոռոչի շունտավորում
• թմբկաթաղանթի վերականգնում (միրինգոպլաստիկա) դասական և էնդոսկոպիկ եղանակով
• ստապեդոպլաստիկա (ասպանդակային ոսկրիկի վերականգնում միկրովիրաբուժական պրոթեզների կիրառմամբ)
• մաստոիդէկտոմիա
• օտոպլաստիկա (ականջախեցու փոքրացում)
• ականջախեցու բարորակ և չարորակ ուռուցքների հեռացում

Պարանոցի և կոկորդի վիրահատություններ՝

• պարանոցի առաջային և կողմնային հատվածների կիստայի հեռացում
• ձայնալարերի պոլիպների հեռացում էնդոսկոպիկ եղանակով՝ դասական և ռադիոհաճախային միկրովրիաբուժական ասեղի միջոցով
• կոկորդի մասնահատում
• կոկորդի հեռացում (լարնգէկտոմիա)
• կոկորդի հեռացում (լարնգէկտոմիա) լիմֆոդիսեկցիայով
• խորդէկտոմիա
• լարինգոտոմիայի և տրախեոտոմիայի հետվիրահատական դեֆեկտների պլաստիկ վերականգնում
• ձայնը վերկանգնող վիրահատություններ
• տրախեոտոմիա
• պարանոցի և կոկորդի այլ վիրահատություններ

2004 թվականից ԱՄՆ Կալիֆոռնիա նահանգի UCLA համալսարանի հետ համագործակցությամբ Հայաստանում մեկնարկել է Կոխլեար իմպլանտացիայի ծրագիրը: Աշխարհահռչակ քիթ-կոկորդ-ականջաբան պրոֆեսոր Ակիրա Իշիյամայի գլխավորությամբ, «Հայկական բժշկական հիմնադրամի» ղեկավար Սալբի Ագարակյանի օժանդակությամբ և «էրեբունի» ԲԿ ղեկավարության ջանքերով բազմաթիվ երեխաներ կյանքում առաջին անգամ ձայն լսելու և խոսելու հնարավորություն են ստացել: Այս համագործակցության արդյուքնում թանկարժեք կոխլեար իմպլանտները հասանելի են դառնում հայաստանցի երեխաներին: Բաժանմունքը համագործակցում է Եվրոպայի, Ասիայի և Ամերիկայի առաջատար կլինիկաների հետ, որտեղ նաև մասնագետները վերապատրասվում են: «Էրեբունի» ԲԿ քիթ-կոկորդ-ականջաբանության բաժանմունքը հանդիսանում է Մխիթար Հերացու անվան Երևանի պետական բժշկական համալսարանի քիթ-կոկորդ-ականջաբանության և ՀՀ ԱՆ Առողջապահության ազգային ինստիտուտի գլխի և պարանոցի վիրաբուժության ամբիոնների հիմնական բազան: