Մինիմալ-ինվազիվ վիրաբուժության բաժանմունք

Ընդհանուր նկարագրություն

Մինիմալ-ինվազիվ վիրաբուժությունը ժամանակակից բժշկության ամենաարդիական և արագ զարգացող ուղղություններից է: Ի տարբերություն վիրաբուժության ավանդական եղանակների` մինիմալ-ինվազիվ վիրաբուժության ժամանակ բարդությունները զգալիորեն քիչ են, այդ թվում՝ կպումային հիվանդությունը, ճողվածքները, հետվիրահատական վերքերի բորբոքումը և այլն: Նվազագույն վնասվածքը զգալիորեն կրճատում է հիվանդների ապաքինման ժամկետները:

Մինիմալ-ինվազիվ լապարասկոպիկ կամ «անարյուն» վիրաբուժության բաժանմունքի գործունեությունն իրականացվում է որովայնային վիրաբուժության կազմում՝ ժամանակակից չափանիշներին համապատասխան: Կիրառելով հատուկ տեխնիկա՝ մանրադիտակներով մինի խցիկներ, օպտիկամանրաթելային լուսավորում և բարձր թույլտվության մոնիտորներ, մասնագետներն իրականացնում են փոքր կտրվածքներով վիրահատություններ, որոնք ավարտվում են մեկ կամ երկու կարով: Այսպիսով, հյուսվածքների վնասումը հասցվում է նվազագույնի, հետվիրահատական շրջանում ցավերը լինում են աննշան, իսկ հիվանդանոցում գտնվելու ժամանակը զգալիորեն կրճատվում է:

Մինիմալ-ինվազիվ լապարասկոպիկ վիրաբուժությունը հնարավորություն է տալիս իրականացնել նաև փոքր ծավալով միջամտություններ. ախտորոշիչ և բուժական պունկցիաներ, դրենավորում՝ լրացուցիչ վիրահատական միջամտություններից խուսափելու նպատակով:

Մինիմալ-ինվազիվ վիրահատություններն ունեն մի շարք առավելություններ.

փոքր կտրվածքների շնորհիվ հիվանդներն ավելի հազվադեպ են այնպիսի ցավ զգում, որի համար անհրաժեշտ լինեն ցավազրկող դեղեր,
ի տարբերություն ավանդական բաց վիրաբուժության` վիրահատությունից հետո հիվանդի աղիների նորմալ գործունեությունը, ինչպես նաև աշխատունակությունը, վերականգնվում են ամենակարճ ժամանակում,
զգալիորեն լավանում է հիվանդի վիճակը և նրա կյանքի որակը, կրճատվում են հոսպիտալացման ժամկետները,
մինիմալ-ինվազիվ վիրահատություններն առավել պակաս են վնասում հարևան հյուսվածքային կառուցվածքները՝ հնարավորություն տալով խուսափել վիրահատության ժամանակ արյան զգալի կորստից:

Իր գործունեության ընթացքում բաժանմունքը ղեկավարվում է միջազգային ուղեցույցներով և չափանիշներով: Բաժանմունքում անարդյունավետության ցուցանիշները և վիրահատական միջամտություններից հետո բարդությունների մակարդակն աննշան են և համեմատելի են ընդունված միջազգային չափանիշներին:

Տեսնել ավելին

Բաժանմունքը հագեցած է ամենաժամանակակից սարքավորումներով, որոնք իդեալական են բարձր ճշգրտություն և պատասխանատվություն պահանջող ամենաբարդ վիրահատությունների իրականացման համար, այդ թվում՝ լապարասկոպիկ Dyonics սարքով, գերձայնային AutoSonix դեստրուկտորով, «բաց վիրաբուժության» համար անհրաժեշտ գործիքների հավաքածուով:

Մինիմալ-ինվազիվ վիրաբուժության բաժանմունքի գործունեության հիմնական և առաջնահերթ ուղղություններն են.

լապարասկոպիկ վիրաբուժությունը,
բարիատրիկ վիրաբուժությունը,
մինիմալ-ինվազիվ վիրաբուժությունն ուռուցքաբանության մեջ,
հեպատոբիլիար մինիմալ-ինվազիվ վիրաբուժությունը,
որովայնային մինիմալ-ինվազիվ վիրաբուժությունը :

Մինիմալ-ինվազիվ վիրաբուժության բաժանմունքում բուժվում են որովայնի խոռոչի օրգանների (այդ թվում՝ լյարդ, լեղապարկ, ստամոքս, հաստ և բարակ աղիներ, ենթաստամոքսային գեղձ) հիվանդությամբ տառապող պացիենտները: Իրականացվում է նաև տարբեր տեղակայման ճողվածքների բուժում: Կիրառելով ստամոքսի օղակավորման, շունտավորման տարբեր ձևերը, գաստրոպլաստիկայի թևքային եղանակը` կազմակերպվում է ճարպակալում ունեցող պացիենտների բուժումը (բարիատրիկ վիրաբուժություն):

Վերջին երկու տարիների ընթացքում բաժանմունքում իրականացվել է ավելի քան 500 լապարասկոպիկ վիրահատություն: Ապենդիցիտի և լեղաքարային հիվանդության ժամանակ 98% դեպքերում միջամտությունն իրականացվում է լապարասկոպիկ եղանակով:

Բաժանմունքում իրականացվել են բարդ լապարասկոպիկ վիրահատություններ, ինչպես օրինակ` ուղիղ աղու առաջային ռեզեկցիան, սիգմայաձև աղու ռեզեկցիան, հեմիկոլէկտոմիան, թևքային գաստրոպլաստիկան և պանկրեատոդուոդենալ ռեզեկցիան:

Իր գործունեության ընթացքում բաժանմունքը ղեկավարվում է միջազգային ուղեցույցներով և չափանիշներով: Բաժանմունքում արդյունավետության ցուցանիշները և վիրահատական միջամտություններից հետո բարդությունների մակարդակը համեմատելի են ընդունված միջազգային չափանիշների հետ:

Մինիմալ-ինվազիվ վիրահատությունների սպեկտրը.

		Վիրահատություններ ուղիղ աղու վրա.

մասնակի կամ ամբողջական ռեզեկցիա (հեռացում)՝ չարորակ ուռուցքի առկայության դեպքում, վիրահատություններ ուղիղ աղու արտանկման ժամանակ, ուղիղ աղու ամբողջական հեռացում աղիների քրոնիկական բորբոքային հիվանդությունների, խոցային կոլիտի ժամանակ՝ առավելագույնս պահպանելով սեղմակի ֆունկցիան:

		Վիրահատություններ հաստ աղու վրա.

մասնակի հեռացում՝ քաղցկեղի և չափերով մեծ բարորակ ուռուցքների առկայության դեպքում, մասնակի հեռացում՝ աղիների սուր կամ քրոնիկական բորբոքային հիվանդությունների ժամանակ (դիվերտիկուլոզ, Կրոնի հիվանդություն), մասնակի հեռացում՝ աղիքային արյունահոսությունների ժամանակ, հաստ և ուղիղ աղու ամբողջական ռեզեկցիա աղիների քրոնիկական բորբոքային հիվանդությունների ժամանակ (խոցային կոլիտ)՝առավելագույնս պահպանելով սեղմակի ֆունկցիան:

		Վիրահատություններ կույր աղու վրա.

կույր աղու ռեզեկցիա (հեռացում) սուր և քրոնիկական բորբոքումների ժամանակ (ապենդիցիտ):

		Վիրահատություններ բարակ աղու վրա.

բարակ աղու մասնակի հեռացում՝ տեղային սահմանափակված ուռուցքի ժամանակ, բարակ աղու մասնակի հեռացում՝ աղիների քրոնիկական բորբոքային հիվանդությունների ժամանակ (Կրոնի հիվանդություն):

		Վիրահատություններ ստամոքսի վրա.

ստամոքսի մասնակի հեռացում՝ բարորակ ուռուցքների ժամանակ, այրոցքով ուղեկցվող ստոծանու կերակրափողային բացվածքի ճողվածքի ժամանակ (ռեֆլյուքս), վիրահատական միջամտություններ՝ ստամոքսի` ամբողջովին կրծքավանդակի խոռոչ տեղաշարժվելու ժամանակ, ստամոքսի պատռվածքի ժամանակ անհետաձգելի բուժօգնության ցուցաբերում:

		Վիրահատություններ փայծաղի վրա.

փայծաղի ամբողջական հեռացում, փայծաղի կիստոզ գոյացությունների լապարասկոպիկ հատում:

		Վիրահատություններ մակերիկամների վրա.

մակերիկամների ամբողջական կամ մասնակի հեռացում ուռուցքների ժամանակ:

		Վիրահատություններ լյարդի վրա.

լյարդի մակերեսային օջախային գոյացությունների հեռացում, լյարդի բիոպսիա, լյարդի կիստոզ գոյացությունների լապարասկոպիկ հատում:

		Վիրահատություններ լեղապարկի վրա.

լեղապարկի հեռացում լեղաքարային հիվանդության ժամանակ:

		Վիրահատություններ ստոծանու վրա.

ստոծանու ճողվածքների ժամանակ դեֆեկտի կարում:

		Վիրահատություններ որովայնի խոռոչում.

ներքին օրգանների լապարասկոպիկ հետազոտություն՝ ախտորոշման նպատակով, հյուսվածքներից նմուշի ստացում, ոչ մեծ ուռուցքների և ավշային հանգույցների պունկցիա:

		Վիրահատություններ աճուկային շրջանում.

աճուկային ճողվածքներ՝ որովայնային խոռոչի գոտում, աճուկային ճողվածքներ՝ որովայնային պատի շրջանում:

«Էրեբունի» բժշկական կենտրոն